ខេត្តបន្ទាយមានជ័យ ៖ ជារៀងរាល់ថ្ងៃគេសង្កេតឃើញថា មានពលករខ្មែរជាច្រើននាក់បាននាំគ្នាសម្រុកឆ្លងដែនទៅប្រទេសថៃ ដោយខុសច្បាប់យ៉ាងគគ្រឹកគគ្រែង តាមច្រករបៀងយោធាអភិវឌ្ឍន៍ភូមិភាគ៥ ដែលមានលោកវរសេនីយ៍ឯក ង៉ែត ព្រឿង ជាមេបញ្ជការ និងជាអតីតមេបញ្ជាការយោធាល្បាតព្រំដែនគោកលេខ៥០៣ ស្ថិតនៅក្រោមការគ្រប់គ្រងរបស់ឯកឧត្តមឧត្តមសេនីយ៍ឯក ប៊ុន សេង មេបញ្ជាការរងកងទ័ពជើងគោក និងជាមេបញ្ជាការភូមិភាគ៥។
សកម្មភាពដ៏គឃ្លើនក្នុងការបើកដៃអោយពលករខ្មែរឆ្លងដែនដោយខុសច្បាប់ តានច្រករបៀងស្ថិតនៅក្នុង ភូមិក្តិបថ្ម ឃុំគោករមៀត ស្រុកថ្មពួកបែបនេះ គួរតែអាជ្ញាធរខេត្តមានវិធានការទប់ស្កាត់ជាបន្ទាន់ ។
សកម្មភាពទាំងអស់នេះសបញ្ជាក់អោយឃើញយ៉ាងច្បាស់ក្រឡែតថា លោក ង៉ែត ព្រឿង កំពុងចាត់ក្លាយខ្លួនជាមន្ត្រីធ្វើការងារតាមបែបបិទភ្នែកអោយពលករខ្មែរឆ្លងដែនដោយខុសច្បាប់ទៅប្រទេសថៃឬក៏ប្រងើយកន្តើយក្នុងការអនុវត្តន៍អនុសាសន៍របស់សម្តេចក្រឡាហោម ស ខេង លើវិធានការបង្ការបង្ក្រាបបទល្មើសឆ្លងដែនដោយខុសច្បាប់សាបរលាបជាអសារឥតការ ។
បន្ទាប់ពីអ្នកសារព័ត៌មានយើងបានទទួលព័ត៌មាននេះភ្លាមៗ ក្រុមសារព័ត៌មានយើងបាននាំគ្នាចុះទៅដល់ចំនុចច្រករបៀងក្តិបថ្ម ឬហៅថា(ច្រកលើភ្នំ) ហើយយើងក៏បានឃើញមានរថយន្តជាច្រើនគ្រឿងបានសម្រុកដឹកពលករចូលទៅប្រទេសថៃយ៉ាងគគ្រឹកគគ្រេងដូចពត៌មានមាត់ចាបមាត់ព្រាបពិតប្រាកដមែន ។
អ្វីដែលធ្វើអោយមានការងឿងឆ្ងល់យ៉ាងខ្លាំងនោះគឺយើងឃើញមានរថយន្ត តូរីសពណ៍សមូយគ្រឿងដែលមានស្លាកលេខភ្នំពេញ:2AF-5721 ត្រូវបានយោធាម្នាក់ ដែលជាអ្នកចាំបើកបារាស់ចេញ ចូលច្រកព្រំដែន សង្ខុញដេញអោយត្រលប់ថយក្រោយវិញភ្លាមៗ ក្រោយពីពួកមន្ត្រីយោធានោះបានឃើញក្រុមអ្នកសារព័ត៌មានយើងចុះទៅថតយកពត៌មាននៅទីនោះ។
តាមប្រភពពីបុរសម្នាក់សុំមិនបញ្ចេញឈ្មោះបានប្រាប់អោយដឹងថា ក្រុមមេខ្យល់ដែលបានឃុបឃិតគ្នាជាមួយយោធាអភិវឌ្ឍន៍ភូមិភាគ៥នោះ មានឈ្មោះដូចជា ទី១: ផ្លោក ទី២: ឈ្មោះនី ទី៣: ឈ្មោះ រិន ជាប៉េអិមក្រុងប៉ោយប៉ែតអោយប្រពន្ធឈ្មោះ រស្មី ជាអ្នកបើករថយន្តម៉ាកហាយឡែនឌឺពណ៍ទឹកប្រាក់ក្នុងការដឹកពលករឆ្លងដែន ទី៤: ឈ្មោះ ដា(នៅណងច័ន្ទ) ទី៥ ឈ្មោះ រ៉ួត ទី៦: ឈ្មោះ ចែល័ក្ខ ទី៧: ឈ្មោះ សិទ្ធ ហើយឈ្មោះរបស់មេខ្យល់ទាំងអស់ដូចខាងលើភាគច្រើនសុទ្ធសឹងតែជាអ្នកមានទីលំនៅក្នុងក្រុងប៉ោយប៉ែត។ តាមប្រភពបានបន្តអោយដឹងទៀតថា ចំពោះពលករខ្មែរដែលអាចឆ្លងដែនតាមច្រករបៀងក្តិបថ្មនេះបានត្រូវបង់ប្រាក់អោយទៅយោធាដែលនៅច្រករបៀងមួយនោះក្នុងម្នាក់ៗ១០០០០មួយមឺុនរៀល ឬ១០០មួយរយបាត(លុយថៃ) ចំនែកខាងទាហ៊ានថៃបង់ប្រាក់ក្នុងម្នាក់ៗ២០០(ពីររយបាត) ហើយថ្លៃជិះឡានថៃមេខ្យល់យកក្នុងម្នាក់ចាច់ពី២៥០០ ពីរពាន់ប្រាំរយបាត ទៅ៣០០០ បីពាន់បាត(លុយថៃ) អាស្រ័យតាមជិត រឺ ឆ្ងាយ។ ប្រភពបន្តថា ក្នុង១ថ្ងៃៗ ពលករខ្មែរដែលបានឆ្លងដែនទៅប្រទេសថៃតាមច្រលរបៀងមួយនេះមិនក្រោមពី៣០០នាក់នោះទេ។
មជ្ឍដ្ឋានជាច្រើនបានរិះគន់ថាដោយសារតែស្រលាញ់លុយពេកទើប លោក ង៉ែត ព្រឿង ភ្លេចគិតនិងមិនខ្វល់ពីជីវិត និងពីការគ្រោះថ្នាក់របស់ពលរដ្ឋខ្មែរទោះបីធ្លាប់បានដឹងបានលឺហើយថា កន្លងទៅមានប្រជាពលរដ្ឋខ្មែរយើងច្រើនណាស់ដែលត្រូវបានចាញ់បោកមេខ្យល់យកទៅលក់ និងខ្លះទៀតបានស្លាប់ដោយសារគ្រោះថ្នាក់ចរាចរណ៍ខណះពេលដែលទាហ៊ានបានដឹងហើញបានបើកឡានដេញចាប់ឡានរបស់ជនជាតិថៃដែលដឹកជញ្ជួនពលករខ្មែរយើងទៅតាមរាជធានី/ខេត្ត ។
ពាក់ព័ន្ធទៅនិងបញ្ហាដូចខាងលើអង្គភាពសារព័ត៌យើងមិនអាចសុំធ្វើការបំភ្លឺពីលោក ង៉ែត ព្រឿង មេបញ្ជាការយោធាអភិវឌ្ឍន៍ភូមិភាគ៥បាននោះទេ៕
ដោយ ម៉េង ហ៊ី ប៉ោយប៉ែត
