កំពត ៖ ប្រជាពលរដ្ឋចំនួន១៨៨គ្រួសារស្ថិតក្នុងភូមិដាសស្គរ ឃុំបឹងសាលាខាងជើង និងភូមិកោះខ្លូត ឃុំកំពង់ត្រាចខាងកើត ស្រុកកំពង់ត្រាច ខេត្តកំពត បានលើកយោបល់ និងផ្តិតមេដៃជំទាសចំពោះការប៉ុនប៉ងលុបដីបឹងឈូកដែលជាជ្រលងអូរបង្ហៀរទឹក ស្ថិតក្នុងភូមិបឹងធំខាងលិច ឃុំអង្គសុរភី ស្រុកកំពង់ត្រាច ពីសំណាក់ក្រូមគ្រួសារដ៏ស្តុកស្តម្ភមួយគ្រួសារ ដែលអាងមានលុយកាក់ទ្រព្យធនហូរហៀកំពុងព្យាយាមចង់លេបត្របាក់យកដីបឹងដែលជាសម្បតិ្តរដ្ឋមកធ្វើជាសម្បតិ្តឯកជនផ្ទាល់ខ្លួន។
ប្រជាពលរដ្ឋលើកឡើងបែបនេះ ក្នុងវេទិកាសាធារណៈ ដើម្បីត្រួតពិនិត្យ និងគាំទ្រការអនុវត្តកម្មវិធីនយោបាយនិងយុទ្ធសាស្ត្រចតុកោណដំណាក់កាលទី៣របស់រាជរដ្ឋាភិបាល នៅឃុំបឹងសាលាខាងជើង ស្រុកកំពង់ត្រាច ខេត្តកំពត ក្រោមអធិបតីភាព លោក អីុវ ផល្លី អនុរដ្ឋលេខាធិការក្រសួងព័ត៌មាន និងជាប្រធានក្រុមការងារចុះជួយស្រុកកំពង់ត្រាចដោយក្នុងនោះរួមមាន លោកជួន សុភា អភិបាលរងស្រុកកំពង់ត្រាច អមដោយក្រុមការងារ និងអាជ្ញាធរមូលដ្ឋាន ព្រមទាំងប្រជាពលរដ្ឋប្រមាណជាង២០០នាក់ចូលរួមក្នុងកម្មវីធីដ៏អធិកអធមមួយនេះ។ ។
វេទិកាក៏បានលើកឡើងពីបញ្ហាប្រឈមនានាដែលបានកំពុង និងជំរុញឱ្យអាជ្ញាធរជួយរកដំណោះស្រាយ លើបព្ហាាចោទជាពិសេសៗដូចជាករណីផ្ទុះឡើងនូវសកម្មភាពប៉ុនប៉ងទន្ទ្រានលប់ដីបឹងឈូករបស់រដ្ឋ ដែលធ្វើឱ្យបិទផ្លូវទឹករបស់បងប្អូនប្រជាពលរដ្ធមិនអាចប្រកបការងារបង្ករបង្កើនផលកសិកម្មបានសមស្របឡើយ។
ទន្ទឹមនឹងនេះ ប្រជាពលរដ្ឋចំនួន១៨៨គ្រួសារបានសំដែងនូវការប្រឆាំងយ៉ាងដាច់អហង្កាមិនអនុញ្ញាតឱ្យបុគ្គលណាម្នាក់មកបំផ្លិចបំផ្លាញផលប្រយោជន៍សាធារណៈ បាននោះឡើយ ព្រោះការចាក់លុបបឹងនេះនឹងធ្វើឱ្យមានការប៉ះពាល់យ៉ាងធ្ងន់ធ្ងរដល់ប្រជាពលរដ្ឋរាប់រយគ្រួសារឯណោះ ហើយជាពិសេសប្រសិនមានការលុបបឹងនោះមែនវានិងបង្ករនូវបព្ហាាចោទខណៈពេលមានភ្លៀងធ្លាក់ក្នុងរដូវវស្សាមូលដ្ធានខាងលើនិងក្លាយទីដក់ទឹកលិចលង់ដោយមិនអាចរំដោះទឹកចេញពីទីតាំងខាងលើទៅទីណាបានឡើយ។
បើតាមការលើកឡើងពីសំណាក់ លោក ផូ ហ៊ ប្រជាពលរដ្ឋរស់ក្នុងភូមិកោះខ្លូត ឃុំកំពង់ត្រាចខាងកើត ស្រុកកំពង់ត្រាច បានបញ្ជាក់ដោយមឺុងម៉ាត់ថា គាត់ ព្រមទាំងប្រជាពលរដ្ឋរាប់រយគ្រួសារដែលរស់នៅក្នុងភូមិសាស្ត្រខាងលើ មិនព្រមអនុញ្ញាតឱ្យបុគ្គលណាចាក់ដីលុបបឹងឈូកនេះទេ ព្រោះទីតាំងដែលគេបំណងចាក់លុបនោះ ជាដង្ហើមស្លាប់រស់របស់ពួកគាត់។
យ៉ាងណាម៉ិញ លោក ផូ ហ៊ ក៏បានសំណូមពរឱ្យអាជ្ញាធរ មានវិធានការទប់ស្កាត់និងគ្រប់គ្រងដីប្រឡាយ បឹងបួរទុកជាសម្បតិ្តរដ្ឋវិញ ពោលគឺត្រូវតែរក្សាជាបឹងប្រវតិ្តសាស្ត្រឱ្យនៅដូចដើម ហើយមានទំហំដូចមុនដដែល។
ដោយឡែក អ្នកមីងកុល ឈៀន ប្រជាពលរដ្ឋរស់នៅក្នុងភូមិដាសស្គរ ឃុំបឹងសាលាខាងជើង បានលើកឡើងថា គាត់សុំជំទាស់ដាច់ខាត មិនព្រមឱ្យបុគ្គល ឈ្មោះ សំ អេន និងប្រពន្ធឈ្មោះ សេង យិ ចាក់ដីលុបបឹងរំលោភយកធ្វើជាកម្មសិទ្ធផ្តាច់មុខនោះឡើយ គាត់ស៊ូប្តូរជីវិតការពារបឹងរួមមួយនេះ ព្រោះបើហ៊ានតែចាក់លុបបឹងឈូកនេះមែន ដីស្រែ និងលំនៅឋានរបស់គាត់ ព្រមទាំងប្រជាពលរដ្ឋរស់ក្នុងភូមិសាស្ត្រខាងលើនឹងត្រូវលិចលង់ហិនហោចគ្មានសល់អ្វីនោះឡើយ។
សូមបញ្ជាក់ផងដែរថា៖ បើតាមការលើកឡើងពី លោក អ៊ីវ ផល្លី ប្រធានក្រុមការងារចុះជួយស្រុកកំពង់ត្រាច បានលើកឡើងថា រាល់សំណូមពរ ក៏ដូចជាបញ្ហាប្រឈមនានា លោកនឹងធ្វើរបាយកាណ៍ដើម្បីសុំពិគ្រោះយោបល់សម្រាប់រកដំណោះស្រាយជូនទៅតាមសំណូមពរ ដែលបងប្អូនបានលើកឡើងពីផលប៉ះពាល់ដូចខាងលើ ប៉ុន្តែការចាក់លុបដីបឹងឬប្រឡាយ បើបុគ្គលណាហ៊ានប្រព្រឹត្ត គឺជាទង្វើខុសនឹងច្បាប់ដូចជាករណីលបុបបឹងឈូករបស់រដ្ឋ ដែលជាជ្រលងបង្ហូរទឹក ស្ថិតក្នុងភូមិបឹងធំខាងលិច ឃុំអង្គសុរភី ស្រុកកំពង់ត្រាច គឺជាបញ្ហាប្រឈមមួយដែលធ្វើឱ្យប៉ះពាល់យ៉ាងធ្ងន់ធ្ងរដល់ប្រជាពលរដ្ឋរាប់រយគ្រួសារដែលរស់នៅក្នុងភូមិ ឃុំខាងលើយ៉ាងពិតប្រាកដណាស់។
ដូច្នេះ បញ្ហានេះត្រឹមអាជ្ញាធរថ្នាក់ក្រោមពុំមានលទ្ធភាពអាចដោះស្រាយនូវវិវាទនេះបានឡើយ មានតែអាជ្ញាធរថ្នាក់លើទើបអាចដោះកង្វល់នេះបាន។
ស្របគ្នានឹងករណីនេះ លោក ជួន សុភអភិបាលរងស្រុកកំពង់ត្រាច បានបញ្ជាក់យ៉ាងដូច្នោះថា កន្លងមកអាជ្ញាធរស្រុកបានខិតខំទប់ស្កាត់មិនឱ្យបុគ្គលណាចាក់លុបដីបឹងឈូកខាងលើនេះទេ ប៉ុន្តែលោកពូសំ អេន ចេះតែទទូចសុំឱ្យអាជ្ញាធរជួយជំរុញធ្វើប័ណ្ណកម្មសិទ្ធិជូនគាត់ ហើយអាជ្ញាធរនិងជំនាញមិនទាន់ឆ្លើយតបផង ស្រាប់តែគាត់ចេះតែហៅរថយន្តដឹកដីមកចាក់នៅលើដីបឹងឈូកជាបន្តបន្ទាប់ លុះដល់អាជ្ញាធរមកហាមប្រាមបែរជាគាត់មិនស្តាប់ ដោយគាត់សំអាងថាដីបឹងនេះគាត់ដាំឈូកអាស្រ័យផលជាយូរឆ្នាំណាស់មកមកហើយ។
សរុបសេចក្តីមកចំពោះករណីលោកសំ អេន នេះទោះបីទោះជាអាជ្ញាធរស្រុករិះរកមធ្យោបាយមានវិធានការហាមឃាត់ ឬណែណាំបែបណា ក៏គាត់មិនស្តាប់ ឬខ្លាចក្រែងរអែងនោះដែរ មិនដឹងគាត់អាងលើអ្វី??។លោកជួន សុភា បានបញ្ជាក់ទៀតថា អាជ្ញាធរមិនព្រមអនុញ្ញាតឱ្យបុគ្គលណាទន្ទ្រានដីបឹងឈូកនេះបានជាដាច់ខាត។
បន្ទាប់ពីមានការជំទាស់ដាច់ខាតពីប្រជាពលរដ្ឋទាំង១៨៨គ្រួសារ លោក សំ អេន ក៏បាននិយាយថា ដីបឹងឈូកនេះលោកបានដាំឈូកអាស្រ័យផលតាំងពីឆ្នាំ១៩៨៣មកម្លេះ ទើបគាត់ចង់ស្នើសុំឱ្យអាជ្ញាធរធ្វើប័ណ្ណកម្មសិទ្ធិ ប៉ុន្តែបើអាជ្ញាធរដកហូតយកជាសម្បតិ្តរដ្ឋវិញ លោកក៏មិនជំទាស់អ្វីនោះដែរ៕