ជនរងគ្រោះឈ្មោះ អិត នឿយ ភេទប្រុស អាយុ ៣១ ឆ្នាំ មានទីលំនៅភូមិស្វាយព្រៃ ឃុំល្វាស្រុកបវេលខេត្តបាត់ដំបង ប៉ុន្តែបានមកស្នាក់នៅបណ្ដោះអាសន្ននៅភូមិអូរត្រាវជួរ ឃុំសេរីមានជ័យ ស្រុកសំពៅលូន ខេត្តបាត់ដំបង បានមកដេកស្លាប់នៅក្នុងចំការរបស់ឈ្មោះវិនពៅ។
យោងតាមការឆ្លើយបំភ្លឺរបស់ឈ្មោះ ភាន សុផាត អាយុ ៣១ ឆ្នាំ បានប្រាប់ឲ្យដឹងថាប្តីរបស់គាត់ឈ្មោះ អិត នឿយនេះ បានចេញពីផ្ទះនៅព្រឹកថ្ងៃទី១១ ខែធ្នូ ឆ្នាំ ២០១៨លុះដល់ម៉ោង ១១ បាយថ្ងៃត្រង់ពុំឃើញប្តីត្រឡប់មកហូបបាយវិញផ្ទះគាត់និងសាច់ញាតិក៏ឆោឡោទៅតាមរក ក៏ប៉ុន្តែមិនអាចរកឃើញជនរងគ្រោះភ្លាមៗនោះឡើយ។
ជាចៃដន្យលុះមកដល់ពេលល្ងាចថ្ងៃទី១១ខែធ្នូ ឆ្នាំ២០១៨ វេលាម៉ោងប្រហែល១៤ទើបមានអ្នកភូមិផងរបងជាមួយម្នាក់ បានប្រទះឃើញសាកសពប្ដីរបស់ខ្លួនដេកស្លាប់តែឯងឍឯកោនៅក្នុងចំការដូចដែលបានជំរាបជូនខាងលើ។
តាមការត្រួតពិនិត្យសាកសពរបស់ជនរងគ្រោះ កម្លាំងសមត្ថកិច្ចបានសន្និដ្ឋានថាឈ្មោះអិត នឿយពិតជាស្លាប់ដោយសារពស់ចឹកព្រោះតែមានស្នាមចង្គោមព៌ណខ្មៅរោលហូរឈាមត្រង់បំពង់កចំនួន 2 កន្លែងដោយពុំមានស្លាកស្នាមគួរអោយសង្ស័យក្រៅពីនោះឡើយ។
ក្រោយការធ្វើកោសល្យវិច័យល្អិតល្អន់រួចហើយទើបសមត្ថកិច្ចប្រគល់សាកសពជូនទៅប្រពន្ធ កូនយកទៅធ្វើបុណ្យតាមប្រពៃណី ៕