ភ្នំពេញ ៖ បន្ទាប់ពីប្រមុខរាជរដ្ឋាភិបាល សម្តេចអគ្គមហាសេនាបតីតេជោ ហ៊ុន សែន ចេញបទបញ្ជា ដែលធ្វើឡើងនៅក្នុងកិច្ចប្រជុំគណៈកម្មាធិការកណ្តាលរបស់គណបក្សប្រជាជនកម្ពុជា នៅមជ្ឈមណ្ឌលពិព័រណ៍ និងសន្និបាតកោះពេជ្រ នាថ្ងៃទី២២ ខែសីហា ឆ្នាំ២០១៩ ហើយបានរំលឹកម្តងទៀត នៅក្នុងកិច្ចប្រជុំគណៈរដ្ឋមន្ត្រី កាលពីថ្ងៃសុក្រ ទី៣០ ខែសីហា ឆ្នាំ២០១៩មកនោះ។
សម្តេចបានបញ្ជាយ៉ាងមុឹងម៉ាត់ប្រកាសឈប់ឲ្យកងកម្លាំងប្រដាប់អាវុធនៅកម្ពុជាមានងារជា «ឧកញ៉ា» ពោលគឺម្នាក់ៗអាចមានសិទ្ធរើសយកតួនាទីតែមួយប៉ុណ្ណោះ បើជ្រើសរើសយកងារជាឧកញ៉ាត្រូវលាលែងពីកងកម្លាំងប្រដាប់អាវុធ និង បើជ្រើសរើសយកតួនាទីជាកងកម្លាំងប្រដាប់អាវុធត្រូវលាឈប់ងារជាឧកញ៉ា។
គិតមកដល់ពេលនេះមានឧកញ៉ា៤៥រូបបោះបង់ងារជាឧកញ៉ា ខណៈដែលឧកញ៉ា១៦រូប ស្ម័គ្រចិត្តលាលែងឈប់ពីតួនាទីជាកងកម្លាំង។
ឯកឧត្តម នាយឧត្តមសេនីយ៍ ឈុំ សុជាតិ អ្នកនាំពាក្យក្រសួងការពារជាតិ បានប្រាប់ ឱ្យដឹងថា បន្ទាប់ពីសម្តេចតេជោហ៊ុនសែនចេញបទបញ្ជាយ៉ាងដាច់ណាត់ រួចមកមាន មន្ត្រីយោធា និងឧកញ៉ាមួយចំនួន ក៏បានដាក់ពាក្យសុំលាលែងពីជួរកងទ័ពជាបន្ដបន្ទាប់ ហើយក៏មានឧកញ៉ាមួយចំនួនក៏បានលាលែងពីងារជាឧកញ៉ាផងដែរជាក់ស្ដែងនៅពេលនេះមានឧកញ៉ាចំនួន១៦រូបបានលាលែងពីយោធានិងមានឧកញ៉ាចំនួន៤៥រូបបានបោះបង់ងារជាឧកញ៉ាផងដែរ។
អ្នកនាំពាក្យក្រសួងការពារជាតិ បានបញ្ជាក់ប្រាប់ ឱ្យដឹងថា យោធាដែលមានងារជាឧកញ៉ា បានរកឃើញទាំង៦១រូបនេះ គឺស្ថិតនៅក្នុងកម្រិតកងយោធពលខេមរភូមិន្ទ ខណៈដែលក្រសួងការពារជាតិ កំពុងត្រួតពិនិត្យ មើលមន្ត្រីយោធា ក្នុងក្របខណ្ឌក្រសួងការពារជាតិ ដែលមានងារជាឧកញ៉ាផ្សេងៗថែមទៀត។
ស្របពេលជាមួយគ្នានេះដែរ ក្រសួងការពារជាតិក៏កំពុងរៀបចំ កិច្ចប្រជុំមួយដាក់ឱ្យជ្រើសរើសរវាង ឧកញ៉ា និង តួនាទីជាយោធា ។
សូមបញ្ជាក់ថា សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានបញ្ជាក់យ៉ាងដាច់ណាត់មិនឱ្យកង កម្លាំងប្រដាប់អាវុធនៅកម្ពុជា មានទាហាន នគរបាល និងកងរាជអាវុធហត្ថ មានងារជា «ឧកញ៉ា» តទៅទៀតនោះទេ ហើយកងកម្លាំងប្រដាប់អាវុធណា ដែលមានងារជា «ឧកញ៉ា» ធ្វើការជ្រើសរើសជាបន្ទាន់ថាតើត្រូវយកងារ «ឧកញ៉ា» ឬយកតួនាទីរបស់ខ្លួន។
សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិបានឱ្យដឹងថា ការងារនេះនឹងត្រូវធ្វើឱ្យច្បាស់លាស់ និងជាក់លាក់ ដែលជាកំណែទម្រង់របស់រាជរដ្ឋាភិបាលកម្ពុជា នៅក្នុងជួរកងទ័ព៕