ខេត្តពោធិ៍សាត់៖ បទល្មើស ពិតជាមហាសំបូរមែន នៅខេត្តពោធិ៍សាត់ ជាក់ស្ដែងកម្លាំងចម្រុះសហការរួមមានកងរាជអាវុធហត្ថស្រុក ប៉េអឹមខេត្ត ប៉េអឹមលើផ្ទៃប្រទេស និងអង្កការវ៉ាយអេតបានចុះបង្រៀនការលក់ដូរសាច់សត្វព្រៃខុសច្បាប់ និងឃាត់ខ្លួនអ្នកលក់សាច់សត្វព្រៃ ២នាក់រួមទាំងវត្ថុតាង(សាច់)ជិត ២០០គីឡូក្រាមពុំអាចគេចខ្លួនបានឡើយ។
ប្រតិបត្តិការនេះធ្វើឡើងនៅវេលាម៉ោង១១ និង ៣០នាទីថ្ងៃត្រង់ ថ្ងៃព្រហស្បតិ៍ ១៤កើត ខែភទ្របទ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី១២ ខែកញ្ញា ឆ្នាំ២០១៩ ត្រង់ចំណុចអាហារដ្ឋានយីហោ(កាង ហេវ) និង(ស្រីឡា) ស្ថិតក្នុងភូមិប្រម៉ោយ ឃុំប្រម៉ោយស្រុកវាលវែងខេត្តពោធិ៍សាត់ ។
យោងតាមរបាយការណ៍មូលដ្ឋានកងរាជអាុធហត្ថស្រុកវាលវែងបានអោយដឹងថា:ម្ចាស់អាហារដ្ឋានយីហោ(កាង ហេវ)ត្រូវបានកម្លាំងឃាត់ចាប់ខ្លួនឈ្មោះ យាយ ហេវ និងម្ចាស់អាហារដ្ឋានយីហោ(ស្រី ឡា)ឈ្មោះ កាង ឡា អ្នកទាំង ២នាក់ បច្ចុប្បន្ន មានទីលំនៅភូមិ.ឃុំកើតហេតុខាងលើ ។
ប្រភពព័ត៌មានខាងលើបានបន្ថែមថា:ទន្ទឹមនិងការឃាត់ខ្លួនម្ចាស់ហាងសមត្ថកិច្ចបានដកហូតនូវវត្ថុតាងជាករួមមាន សាច់កាំប្រម៉ាចំនួន ៥៧គីឡូក្រាម សាច់កេះចំនួន ០៩គីឡូក្រាម សាច់ជ្រូកព្រៃចំនួន ៦៨គីឡូក្រាម សាច់ឈ្លូសចំនួន ២៨គីឡូក្រាម សាច់កន្ធាយចំនួន ០៨គីឡូក្រាម សាច់ត្រកួតចំនួន ២,៥គីឡូក្រាម សាច់សរុបទាំងអស់ចំនួន ១៧២,៥គីឡូក្រាម ។
ប្រភពដដែលបន្តទៀតថា ចំពោះជនសង្ស័យជាម្ចាស់អាហារដ្ឋានទាំងពីយីហោ ដែលជាប់ពាក់ព័ន្ធករណីសាច់សត្វព្រៃត្រូវឃាត់ចាប់ខ្លួន រួមទាំងវត្ថុតាងសាច់សត្វព្រៃសរុបចំនួន ១៧២,៥គីឡូក្រាម បញ្ជូនទៅស្នាក់ការអង្កវ៉ាយអេត ដើម្បីបំពេញសំណុំឯកសារបញ្ជូនទៅស្ថាប័នមានសមត្ថកិច្ចចាត់ការបន្តបន្ត ៕