ខេត្តស្ទឹងត្រែង ៖ ថ្ងៃអង្គារ ០៨កើត ខែមិគសិរ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី២២ ខែធ្នូ ឆ្នាំ២០២០ នៅវេលាម៉ោង ១១:៤៥នាទី មន្ត្រីអនុវត្តច្បាប់ នៃការិយាល័យប្រឆាំងគ្រឿងញៀន សហការជាមួយកម្លាំងអធិការដ្ឋាននគរបាលស្រុកបុរីអូរស្វាយសែនជ័យ សហការជាមួយកម្លាំងឧទ្យានុរក្សប្រចាំស្នាក់ការរ៉ាមសារ ស្រុកបុរីអូរស្វាយសែនជ័យបានចាប់ បង្ក្រាបករណីជួញដូរ និងប្រើប្រាស់សារធាតុញៀនដោយខុសច្បាប់។
សមត្ថកិច្ចបានឲ្យដឹងថា: ក្នុងប្រតិបត្តិការនេះកម្លាំងបានស្ទាក់ឃាត់ខ្លួនជនសង្ស័យម្នាក់ឈ្មោះ ថង វ៉ន ភេទប្រុស អាយុ ៣២ឆ្នាំ ជនជាតិ ខ្មែរ មុខរបរ កសិករ មានទីលំនៅបច្ចុប្បន្នភូមិអូរស្វាយ ឃុំអូរស្វាយ ស្រុកបុរីអូរស្វាយសែនជ័យ ខេត្តស្ទឹងត្រែង ។
ទន្ទឹមនឹងការឃាត់ខ្លួនជនសង្ស័យសមត្ថកិច្ចក៏បានចាប់យកនូវវត្ថុតាងបទល្មើសដូចជាថ្នាំញៀនប្រភេទមេតំហ្វេតាមីន (WY) ចំនួន ០៣កញ្ចប់តូច ទម្ងន់សរុប៦៣,៧៦ ក្រាម រួមនិងដាវសាមរ៉ៃ១ កាំបិត២ ផងដែរ។
បច្ចុប្បន្នសមត្ថកិច្ច នៃការិយាល័យប្រឆាំងគ្រឿងញៀន កំពុងកសាងសំណុំរឿងបញ្ជូន សង្ស័យនិងវត្ថុតាង ទៅសាលាដំបូងខេត្តស្ទឹងត្រែង ដើម្បីចាត់ការតាមនីតិវិធីច្បាប់ ៕