កំពង់ឆ្នាំង ៖ បច្ចុប្បន្ននេះ ដីព្រៃលិចទឹកតំបន់៣គោកព្រះ ក្នុងឃុំច្រណូក ស្រុកកំពង់លែង ត្រូវបានគេសង្កេតឃើញថានៅតែបន្ត រងការកាប់សទន្ទ្រាននិងរំលោភយកពីសំណាក់មន្ត្រីមានអំណាចនិងអ្នកមានលុយ បើទោះជាឯកឧត្តម អភិបាលខេត្តបានចាត់ក្រុមចម្រុះចុះធ្វើការបង្ក្រាបការឈូសឆាយទន្ទ្រានដីព្រៃលិចទឹកដីព្រៃលិចទឹកពីសំណាក់ក្រុមហ៊ុនមួយកាលពីឆ្នាំ២០១៤ នៅចំណុចទួលគោកព្រះ ចំណុចកំពង់តាយ៉ា ក្នុងឃុំច្រណូក ស្រុកកំពង់លែង ខេត្តកំពង់ឆ្នាំង កន្លងទៅ ក្រោយមកក្នុងតំបន់ព្រៃលិចទឹកដែលជាតំបន់៣នោះ ត្រូវបានប្រជាពលរដ្ឋ ក៍ដូចជាសហគមន៍ និងប៉ូលីសដែលចាំដីនៅទីនោះបានខ្សិបប្រាប់អោយដឹងថា ក្រោយការបង្ក្រាបដីចំណុចខាងលើនេះ បានធ្វើការបែងចែកអោយយោធាស្រុកចំនួន១៥០ហិកតា ប៉ូលីស១៥០ហិចតា អាវុធហត្ថ១០០ហិចតា និងទាហានអភិវឌ្ឍន៍ស្រុក២១៧ហិចតា ក្រៅពីនោះ ស្ថិតនៅក្រោមការគ្រប់គ្រង និងកាន់កាប់ដោយ លោក ចេង ញ៉ាន់ អភិបាលរងខេត្តកំពង់ឆ្នាំង និង លោក ចេង ចាន់ដូណា ជាអភិបាលរងស្រុកកំពង់លែងដែលជាកូនរបស់លោកចេង ញ៉ាន់ ។
បច្ចុប្បន្ននេះដីព្រៃលិចទឹកតំបន់៣ចំណុចគោកព្រះ ចំណុចកំពង់តាយ៉ា ក្នុងឃុំច្រណូក ស្រុកកំពង់លែង ខេត្តកំពង់ឆ្នាំង ខាងលើនេះ គេសង្កេតឃើញថាមាន បានចាប់ផ្តើមលួចឃុបឃិតគ្នារឈូសឆាយទន្ទ្រានរាបស្មើចែកគ្នាកាន់ រំលោភយកដីព្រៃលិចទឹកនេះដោយមិនខ្វល់ពីរផ្លូវច្បាប់អ្វីនោះឡើយ ។
ការឈូសឆាយទន្ទ្រានកាន់កាប់ដីចំណុចខាងលើនេះ ហាក់ដូចជាមានសកម្មភាពផ្គើន និងរាជរដ្ឋាភិបាល ជាពិសេស ឯកឧត្តម ទេសរដ្ឋមន្ត្រី ជា សុផារ៉ា ដែលធ្លាប់បានធ្វើការព្រមានទៅលើមន្ត្រីមួយចំនួនដែលបានរំលោភយកដីរបស់រដ្ឋនិងដីរបស់ប្រជារាស្ត្រ នាពេលកន្លងមក។ តែការព្រមានរបស់ទេសរដ្ឋមន្ត្រី មិនត្រូវបានគេខ្លាចឡើយ ហើយថែមទាំងមានសកម្មភាពបន្តយ៉ាងរលូន។ ទោះបីអភិបាលខេត្ត កំពង់ឆ្នាំង ប្រឹងទប់ស្កាត់យ៉ាងណាក៏ដោយ ចំណែកក្រុមចម្រុះអភិបាលខេត្ត កំពង់ឆ្នាំង ហាក់ដូចជាកំពុងក្លាយទៅជាមន្ត្រីជើង១០ ដែលទទួលភារកិច្ចក្នុងការស្រាវជ្រាវករណីរំលោភដីធ្លី ។
ប្រភពបង្ហើបថា ចំពោះដីអ្នកធំនិងអ្នកមានលុយមួយចំនួនអាចត្រូវបានក្រុមមួយនេះរៀបចំឯកសារឲ្យក្លាយទៅជាដីអាស្រ័យផលស្របច្បាប់កុហកចៅហ្វាយខេត្ត ។ មកដល់ពេលលនេះ ទោះជាកន្លែងមួយចំនួនរកឃើញថា ពិតជាមានករណីរំលោភដីធ្លីរបស់រដ្ឋមែនក៏ដោយ តែគេមិនដែលបានឃើញអាជ្ញាធរខេត្ត និងជំនាញ ចាប់ខ្លួនអ្នកមានអំណាចនិងអ្នកមានលុយរំលោភដីធ្លីទាំងនោះ មកផ្តន្នាទោសម្តងណាឡើយ។
ផ្ទុយមកវិញ បើប្រជាពលរដ្ឋដែលគ្រាន់តែចូលអើតករ សឹងតែមិនទាន់ក៏ត្រូវបានអាជ្ញាធរ គេចាប់វាយខ្នោះបង្ហាញថាខ្លួនប្រឹងប្រែងគោរពច្បាប់ការពារព្រៃលិចទឹក។ ជាក់ស្តែងដីព្រៃលិចទឹក នៅចំណុច គោកព្រះ និងទំនាបតាយ៉ាប ភូមិកង្កែប ឃុំច្រណូក ស្រុកំពង់លែង ត្រូវបានមន្ត្រីមួយចំនួនក្នុងខេត្ត ធ្វើការឈូសឆាយ រំលោភយកជិត១០០០ហិចតា ដីខាងលើនេះក្រោមការគ្រប់គ្រងសហគមន៏នេសាទ ឃុំច្រណូក។
មួយរយៈពេលមុន គេសង្កេតឃើញថាក្រុមសហគមន៍នេសាទច្រណូកតែងតែបំពេញការងាររបស់ខ្លួនក្នុងការពារដីយ៉ាងសស្រាក់សស្រាំ តែមួយរយៈពេលក្រោយនេះ ឃើញថាហាក់មិនយកចិត្តទុកដាក់សោះ នាំអោយគេសង្ស័យថាត្រូវដងត្រូវផ្លែ ក្នុងការរំលោកភយកដីចែកគ្នាជាប្រព័ន្ធអស់ហើយ ៕
ដោយ៖ រី ភារិទ្ធិ