ប្រទេសថៃ ៖ ជនជាតិខ្មែរម្នាក់រួមជាមួយនិងរថយន្តដ៏ទំនើបមួយគ្រឿងដែលមានដឹកឈើគ្រញូងបង្កប់ប្រមាណជាជាង២០ដុំត្រូវបានសមត្ថកិច្ចថៃដែលឈរជើងនៅច្រកទ្វារអន្តរជាតិជាំស្រងាំ ស្រុកកាប់ឈើង ខេត្តសុរិន្ទធ្វើការឃាត់ខ្លួនដោយបានដកហូតវត្ថុតាង ព្រមទាំងបានបញ្ជូនទៅកាន់អង្គភាពជំនាញស្រុកកាប់ឈើងដើម្បី សាកសួរនិងចាត់ការតាមនិតិវិធី ។
យោងតាមរបាយការណ៍សមត្ថកិច្ចថៃបានអោយដឹងថាការឃាត់ខ្លួនជនជាតិខ្មែរម្នាក់នេះគឺបានធ្វើឡើងនៅវេលាម៉ោង ៣ និង ៣០ នាទី រសៀល ថ្ងៃទី ១៦ ខែកញ្ញាឆ្នាំ២០១៨ ត្រង់បរិវេណច្រកទ្វារអន្តរជាតិជាំស្រងាំុ ឃុំដាន ស្រុកកាប់ឈើង ខេត្តសុរិន្ទប្រទេសថៃ ។
ជនជាតិខ្មែរដែលសមត្ថកិច្ចចាប់ខ្លួននោះមានឈ្មោះថា អួន លីហ៊រអាយុ២២ឆ្នាំរស់នៅភូមិផ្អង សង្កាត់កូនក្រៀល ក្រុងសំរោង ខេត្តឧត្តរមានជ័យ។
ករណីឃាត់ខ្លួននេះគឺក្នុងខណះជនសង្ស័យបានបើកបររថយន្តមួយគ្រឿងចូលទៅក្នុងទឹកដីថៃតាមច្រកអន្តរជាតិជាំស្រង៉ាំ ចូលទៅក្នុងខេត្តសុរិន្ទលុះពេលចេញពីប្រទេសថៃមកខ្មែរវិញ ទើបតម្រួតថៃមានការសង្ស័យនិងធ្វើការត្រួតពិនិត្យ ថ្វីបើរថយន្តជារថយន្តទំនើបម៉ាក លុចសុីស RX 300 ពាក់ស្លាកលេខ ភ្នំពេញ 2-AE 7608 ក៏ដោយក៏សមត្ថកិច្ចថៃបានរកឃើញថាឡាននោះមានការលបលួចបង្កប់ឈើគ្រញូងចំនួន២៤ ដុំ ស្មានថាគេមិនដឹង។
ក្រោយពេលរកឃើញវត្ថុតាងរួចមក កំលាំងសមត្ថកិច្ចថៃប្រចាំច្រកខាងលើក៏បានធ្វើការប្រគល់ទាំងមនុស្សរួមនិងវត្ថុតាងទៅអោយខាងមេព្រៃស្រុកកាប់ឈើងដើម្បីនាំយកទៅសាកសួរបន្ត ព្រមទាំងរឹបអូសយកវត្ថុតាងទៅរក្សាទុកជាបណ្តោះអាសន្ននៅទីស្នាក់ការមេព្រៃផងដែរផងដែរ ៕
