រតនគិរី ៖ ករណីគ្រោះថ្នាក់ចរាចរណ៍រវាងម៉ូតូនិងរយន្តបានបុកគ្នាបណ្តាលឲ្យបុរសម្នាក់រងរបួសធ្ងន់ ហើយបានដឹកបញ្ជូនទៅសង្គ្រោះបន្ទាន់នៅឯមន្ទីរពេទ្យបង្អែកខេត្ត ក្រោយមកក៏បានស្លាប់បាត់បង់ជីវិត ។
ហេតុការណ៍គ្រោះថ្នាក់ចរាចរណ៍នេះបានកើតឡើងនៅវេលាម៉ោង១៦និង៥៥នាទីថ្ងៃសុក្រទី២៧ ខែវិច្ឆិកា ឆ្នាំ២០២០ តាមបណ្តោយផ្លូវជាតិលេខ៧៨ ក្នុងចន្លោះគីឡូម៉ែត្រ(154-155)ចំណុចផ្លូវកោងស្ថិតនៅក្នុងភូមិ១ ឃុំឡាមិញ ស្រុកបរកែវ ខេត្តរតនគិរី។
សមត្ថកិច្ចនគរបាលបានឲ្យដឹងថា ខណៈនោះអ្នកជិះម៉ូតូបានជ្រុលចង្កូតចូលទៅក្នុងកន្លងផ្លូវរបស់រថយន្តហើយក៏បុករថយន្តតែម្តង អ្នកបើកបរម៉ូតូមានឈ្មោះ ស៊ី សុធាត់ (ហៅ តួ) ភេទប្រុស អាយុ២៣ឆ្នាំ ជនជាតិខ្មែរ(ស្លាប់) មានទីលំនៅភូមិ-ឃុំកើតហេតុខាងលើ ម៉ូតូ១គ្រឿងម៉ាក ZOOMER ពាក់ស្លាកលេខ ស្ទឹងត្រែង1C-04 83 ពណ៌ក្រហម។
ចំណែក រថយន្តម៉ាក HYUNDAI MlGHTY ពណ៌ស មាន ស្លាកលេខភ្នំពេញ 3F20 66 បើកបរដោយឈ្មោះ ស៊ិន វាសនា ភេទប្រុស អាយុ៤៦ឆ្នាំ ជនជាតិខ្មែរ ។ អ្នករួមដំណើរឈ្មោះ សុខ លីដា ភេទស្រី អាយុ៣៨ឆ្នាំ ជនជាតិខ្មែរ ២នាក់ប្ដីប្រពន្ធ មានទីលំនៅភូមិឈើភ្លើង ឃុំ កំពង់ត្រាច ស្រុករមាសហែក ខេត្តស្វាយរៀង។
ក្រោយកើតហេតុសមត្ថកិច្ចមូលដ្ឋានចុះមកអន្តរាគមន៍ធ្វើការវាស់វែងរឹបអូសយកមធ្យោបាយទាំង២គ្រឿងទៅរក្សាទុកនៅប៉ុស្ដិ៍រដ្ឋបាលឃុំឡាមិញដើម្បីធ្វើការសម្របសម្រួលគ្នានៅពេលក្រោយ។
ដោយឡែកសពជនរងគ្រោះត្រូវបានសមត្ថកិច្ចធ្វើកំណត់ហេតុប្រគល់ទៅឲ្យសាច់ញាតិដើម្បីយកទៅធ្វើបុណ្យតាមប្រពៃណី៕ដោយភន់វ៉ាន់ថន (បញ្ញវន្តខ្មែរ)
