ខេត្តរតនគិរី ៖ មន្ត្រីនគរបាលការពារគោដៅសណ្តាប់ធ្នាប់១រូបបានរងរបួសធ្ងន់ធ្ងរខណះឈរបញ្ជាយានយន្តគ្រប់ប្រភេទឲ្យឈប់ដើម្បីត្រួតពិនិត្យសណ្តាប់ធ្នាប់ នៅលើកំណាត់ផ្លូវជាតិលេខ៧៨ ត្រង់ចំណុចហួសផ្លូវកែងប្រមាណជាង៣០០ម៉ែត្រស្ថិតក្នុងភូមិ៣ ឃុំត្រពាំងក្រហម ស្រុកកូនមុំរបស់ខេត្តរតនគិរី ស្រាប់តែឃាត់ប៉ះចំរថយន្តពាក់ស្លាក់លេខ ខ ម (ខេមរភូមិន្ទ)មិនបានគោរពច្បាប់ចរាចរនោះទេ គឺបើកសំដៅបុកយ៉ាងពេញទំហឹងតែម្តង ទៅលើមន្ត្រីនគរបាលរូបនេះបង្កឲ្យរងរបួសយ៉ាងដំណំ។
ករណីរថយន្តបើកបំបុកមនុស្សដើរថ្មើជើងបែបនេះ បានកើតឡើងកាលពីវេលាម៉ោង ៥.១០នាទីព្រលឹមថ្ងៃទី១៦ខែធ្នូឆ្នាំ២០២០។
តាមប្រភពពីសមត្ថកិច្ចប្រចាំគោលដៅនៅកន្លែងកើតហេតុបានឲ្យដឹងថា : មុនពេលកើតហេតុ ឃើញរថយន្តម៉ាក Masada ព័ណត្រេអុី ១គ្រឿងពាក់ស្លាក់លេខ ខ.ម02. 2-1215 មិនស្គាល់អត្តសញ្ញាណ បើកបរក្នុងទិសដៅពីកើតទៅលិច(ពីរតនគិរីទៅស្ទឹងត្រែង) ខណះមកដល់គោលដៅប្រចាំការរបស់នគរបាលការពារសណ្តាប់ធ្នាប់ខាង អ្នកបើកបររថយន្តខមមិនបានគោរពតាមបទបញ្ជារបស់សមត្ថកិច្ចត្រួតពិនិត្យតាមគោលដៅនោះឡើយ ហើយថែមទាំងបំពានច្បាប់ចរាចរដោយបើកឡានលឿនស្លេវកៀរមន្ត្រីនគរបាលរងគ្រោះអោយរងរបួសយ៉ាងធ្ងន់ធ្ងរ។
មន្ត្រីនគរបាលដែលរងរបួសនោះឈ្មោះ ព្រំ ចន្ធី ភេទប្រុស អាយុ ៥៤ ឆ្នាំ ជនជាតិខ្មែរ មុខរបរ នគរបាលការពារសណ្តាប់ធ្នាប់ រងរបួសត្រង់ក្បាល និងចង្កេះត្រូវបានបញ្ជូនទៅមន្ទីរពេទ្យខេត្តដើម្បីសង្គ្រោះបន្ទាន់។
រីឯរថយន្តបង្ក ក្រោយពីបុកគេរួចក៏តាំងជានហ្ការបន្ថែមល្បឿនបើកលឿនស្លុយរហូដល់ភូមិស្រែអង្ក្រង ឃុំត្រពាំងក្រហម ម្ចាស់រថយន្តក៏ដកសោររត់គេចខ្លួនបាត់ស្រមោល។
កម្លាំងនគរបាលអធិការនិងកម្លាំងកងរាជអាវុធហត្ថស្រុកកូនមុំដែលបានដេញតាមយ៉ាងប្រកិត ដល់មកឃើញរថយន្តបង្កត្រូវបានគេទុកផ្លុងចោលក៏ស្ទូចដាក់លើរថយន្ត
យកមករក្សាទុកនៅអធិការនគរបាលស្រុកកូនមុំ ដើម្បីចាត់ការតាមនិតិវិធី៕
