ភ្នំពេញ ៖ នគរបាលអន្តោប្រវេសន៍ក្រសួងហាផ្ទៃ និងមន្ត្រីនគយ ព្រលានយន្តហោះភ្នំពេញ បានសហការឃាត់ខ្លួនជនសង្ស័យជាជនជាតិចិន ៣រូប កាលពីថ្ងៃទី២៣ ខែមេសា ឆ្នាំ២០១៩នៅច្រកទ្វារអាកាសយានដ្ឋានអន្តរជាតិភ្នំពេញពាក់ព័ន្ធនឹងការនាំចូលសាច់ប្រាក់ដុល្លារអាមេរិកចំនួន៣៥២០០០០ដុល្លារអាមេរិកពីទីក្រុងហុងកុង ចូលមកកម្ពុជា ដោយពុំមានការបញ្ជាក់អំពីប្រភពហិរញ្ញវត្ថុ ។
ប្រតិបត្តិការឃាត់ខ្លួនជនសង្ស័យ និងវត្ថុតាងជាសាច់ប្រាក់នេះ ក្នុងនោះ ជនសង្ស័យទី១មានឈ្មោះ Wang Shiping ទី២ឈ្មោះ Wang Lichao ទី៣ឈ្មោះ Zhang Jian។ ជនសង្ស័យទាំង៣គឺជាជនជាតិចិន នឹងធ្លាប់ធ្វើដំណើរទៅមកប្រទេសកម្ពុជាជាច្រើនលើក។នេះបើតាមសេចក្តីរាយការណ៍របស់នគរបាល។
លទ្ធផលនៃការសាកសួរ បានបង្ហាញថា ជនសង្ស័យ២នាក់ គឺឈ្មោះ Wang Shiping និងឈ្មោះ Wang Lichao ពិតជាបានយកសាច់ប្រាក់សរុបចំនួន៣៥២០០០០ដុល្លាអាមេរិកចេញពីទីក្រុងហុងកុងមកកាន់ប្រទេសកម្ពុជាមែន។ ពួកគេអះអាងថាយកលុយចូលមកដើម្បីវិនិយោគលើវិស័យអចលនទ្រព្យ និងសណ្ឋាគារ ដោយប្រាប់ថាប្រភពនៃសាច់ប្រាក់នោះ គឺបានមកពីការឈ្នះល្បែងនៅម៉ាកាវ ខ្ចីបងប្អូន និងខ្លះទៀតបានមកពីផលចំណេញក្រុមហ៊ុន ប៉ុន្តែសុទ្ធតែគ្មានឯកសារបញ្ជាក់។
ជនសង្ស័យម្នាក់ទៀត គឺឈ្មោះ Zhang Jian បានផ្ដល់ចម្លើយថាខ្លួនគ្រាន់តែជាអ្នកមកទទួលឈ្មោះ Wang Shiping និងឈ្មោះ Wang Lichao តាមការគ្រោងទុកប៉ុណ្ណោះ។ផ្អែកតាមលទ្ធផលសាកសួរ និងការត្រួតពិនិត្យឯកសាររបស់ជនសង្ស័យទាំង៣រូបខាងលើ អគ្គនាយកដ្ឋានអន្តោប្រវេសន៍ បានសន្និដ្ឋានថា ជនសង្ស័យឈ្មោះ Wang Shiping និងឈ្មោះ Wang Lichao ពិតជាបាននាំសាច់ប្រាក់ជាង៣លាន៥សែនដុល្លារនោះ ចូលមកប្រទេសកម្ពុជា ដោយគ្មានប្រភពហិរញ្ញវត្ថុច្បាស់លាស់ ដែលសង្ស័យជាការសម្អាតប្រាក់ប្រាកដមែន។ ចំណែក ឈ្មោះ Zhang Jian ក៏សង្ស័យជាប់ពាក់ព័ន្ធនឹងករណីនេះដែរ។
លោក លី សុផាណា អ្នកនាំពាក្យអយ្យការអមសាលាដំបូងរាជធានីភ្នំពេញ
មិនទាន់បានបញ្ជាក់ពីនីតិវិធីបន្តលើករណីនេះនៅឡើយទេ នាព្រលប់ថ្ងៃទី២៦ ខែមេសានេះ ដោយលោកបានប្រាប់តាមបណ្ដាញទំនាក់ទំនងតេឡេក្រាមថា សូមសួរទៅខាងអគ្គនាយកដ្ឋានអន្តោប្រវេសន៌នៃក្រសួងមហាផ្ទៃវិញ។
មន្ត្រីនៃអគ្គនាយកដ្ឋានអន្តោប្រវេសន៌នៃក្រសួងមហាផ្ទៃបានថ្លែងឱ្យដឹងថា បន្ទាប់ពីការឃាត់ខ្លួនសួរចម្លើយ និងត្រួតពិនិត្យឯកសាររបស់ជនសង្ស័យទាំង៣រូបរួចមក សមត្ថកិច្ចបានរៀបចំបែបបទបញ្ជូនទៅកាន់សាលាដំបូងរាជធានីភ្នំពេញ ដើម្បីចាត់ការបន្តតាមនីតិវិធីច្បាប់ស្ដីពីការប្រឆាំងការសម្អាតប្រាក់ និងហិរញ្ញប្បទានភេវរកម្ម ព្រមទាំងច្បាប់ និងលិខិតបទដ្ឋានគតិយុត្តពាក់ព័ន្ធជាធរមាននៃព្រះរាជាណាចក្រកម្ពុជា ហើយជនសង្ស័យនឹងបញ្ជូនទៅតុលាការនៅព្រឹកស្អែក៕
